எஸ்.ராவின் "பேசத்தெரிந்த நிழல்கள்"

நாவலையும்,சினிமாவையும் முறையே வாசகனுக்கும்,பார்வையாளனும் அணுகும்/அணுக வேண்டிய முறை குறித்து இக்கட்டுரையில் வாசித்த வரிகள் சத்தியமானவை.

இலக்கியத்தை வாசிப்பவர்கள் சொற்களின் வழியே ஒரு பிம்பத்தை தாங்களாகவே கற்பனை செய்து கொள்கிறார்கள்.அதில் காட்சிபடுத்துதல் தான் வாசகனின் வேலை.அதே நேரம் சினிமாவோ காட்சிகளை முன்வைக்கிறது.அதை தனது மனதிற்குள் சொற்களாக, நினைவுகளின் பகுதியாக மாற்றிக் கொள்வதை பார்வையாளர்கள் செய்கிறார்கள்"

திரைப்படங்கள்/நடிகர்கள் குறித்த தங்களின் விரிவான பார்வையாய் தமிழில் தொடர்ந்து முன்வைப்பவர்கள் எஸ்.ராவும் சாருவும்.என்னளவில் சாருவின் "தீராக்காதலி"(கே.பி சுந்தராம்பாள்)தொகுப்பு முக்கியமான ஒன்று.ரேயின் "பதேர் பாஞ்சாலி" குறித்த எஸ்.ராவின் 'பதேர் பாஞ்சாலி - நிதர்சன புனைவு" ,ஒரு திரைப்படத்தை மட்டுமே மையமாக கொண்டு தமிழில் வெளிவந்த முதல் நூல் என நினைக்கின்றேன்.நல்ல சினிமாவை,மறக்கடிக்கப்பட்ட நடிகர்களை தம் வாசகர்களுக்கு முன்னெடுத்து செல்லும் இம்முயற்சிகள் இப்பொழுது பரவலாய் காணப்படுவது மகிழ்ச்சிகரமானது.

எஸ்.ராவின் இந்த தொகுப்பு,முழுக்க முழுக்க ஒரு பார்வையாளனின் அவதானிப்பில் தமிழ்,மலையாளம் தொடங்கி உலகளவில் தான் ரசித்த திரைப்படங்கள்,குறும்படங்கள், விருப்பத்திற்குரிய நடிகர்கள்,நேர்காணல்கள் என தகவல்களை பகிர்ந்து கொண்டே செல்கின்றது.




சாவித்திரி,நடிப்பு ராட்சசி.நவராத்திரி திரைப்படத்தில்,மேடை நாடக காட்சியில்..முகத்தை வெட்டி,சிவாஜியிடம்,"அதாகப்பட்டது சுவாமி........." என கூறும் ஒரு காட்சி போதும் அவர் சிறப்பை பகிர.இத்தொகுப்பில் சாவித்திரி குறித்த கட்டுரையை(சாவித்திரி - இரண்டு பிம்பங்கள்) வாசித்து கொண்டிருக்கும் பொழுது,வைகை எக்ஸ்ப்ரஸ்ஸில் அருகில் அமர்ந்திருந்த பெண்மணி புத்தகத்தை வாங்கி ஆர்வமாய் அதை மட்டும் படித்துவிட்டு திருப்பி தந்தார்.கூடவே சாவித்திரி குறித்து தனக்கு தெரிந்த செய்திகளை சொல்லி கொண்டே வந்தார் சோகத்துடன்.அந்த நடிகையின் இறுதி நாட்கள் குறித்த உருக்கமான கட்டுரை அது.

"சிரித்தால் மட்டும் போதுமா?",நடிகர் நாகேஷை குறித்த இக்கட்டுரை அந்த மாபெரும் கலைஞன் குறித்த தகவல்களோடு அவருக்கு மறுக்கப்பட்ட அங்கீகாரம் குறித்தும் பேசுகின்றது. விருதுகளுக்கும் மேலான சிறப்பு ரசிகனின் வரவேற்பே.தருமியும்,செல்லப்பாவும் எளிதில் மறக்க கூடியவர்கள் அல்லவே!மொழி கடந்து சில நடிகர்கள் எளிதில் கவர்ந்து விடுவார்கள்.மலையாள நகைச்சுவை நடிகர்கள் ஜெகதி, ஜகதீஷ்,இன்னொசன்ட் எப்போதும் என் விருப்பதிற்குரியவர்கள்.ஜெகதியும்,இன்னொசென்ட்டும் இல்லாத படங்களே இல்லையா என்று கூட தோன்றும்.இத்தொகுப்பில் "நகைச்சுவை நாயகன்" கட்டுரை ஜெகதி குறித்தானது.

ராஜாவின் திருவாசகம்,முதன்முதலில் கேட்டது ஒரு இரவில்.ராஜாவை அதிகமாய் பிடித்து போன தருணங்களில் அதுவும் ஒன்று."எத்தனை கோபுரங்கள் இருந்தாலும்,தஞ்சை கோபுரம் தனித்துவமானது,ராஜாவும் அது போலவே" என்ற இயக்குனர் பாசிலின் வரிகள் நினைவிற்கு வருகின்றது.திருவாசக இசையில் கரைந்து உருகிய தருணங்களை பதிவு செய்கின்றது "திருவாசகம் கேட்ட பொழுது" கட்டுரை.(ராஜாவின் பாடல்கள் குறித்து விரிவாக எழுத வேண்டும்..எப்பொழுதிற்குமான இசை).

"Wind Migration " மற்றும் "The Forgotten Woman " ஆகிய இரு ஆவணப் படங்கள் குறித்த தகவல்கள் பார்க்கும் ஆவலை தூண்டுபவை.Wind Migration ஆவணப்படத்தின் பல பகுதிகள் இணையத்தில் காணக்கிடைக்கின்றன.பறவைகளின் தீரா பயணத்தில் கொஞ்சம் நாமும் உடன் பயணிக்கும் சுவாரஸ்ய அனுபவம்."The Forgotten Woman ",மதுரா நகரில் தனித்து விடப்பட்ட விதவைகளை குறித்தது.உணவிற்கும்,இருப்பிடத்திற்கும் வழியின்றி எஞ்சிய நாட்களை விதியின் வசம்விட்டு தொடர்ந்து கொண்டிருக்கும் அவர்களின் நிலை குறித்த இப்படத்தை இயக்கியிருப்பவர் திலீப் மேத்தா(தீபா மேத்தாவின் சகோதரர்).

மதுரை இருந்த நாட்களில் உலக சினிமா பார்ப்பதென்பது ஏழு கடல்,ஏழு மலை தாண்டி அடைய வேண்டிய காரியம் என்றிருக்கும்.ஹாலிவுட் படங்கள் குறித்து மட்டுமே அறிந்திருந்த காலம் அது.இணைய அறிமுகத்திற்கு பிறகு அதிகமாய் உலக சினிமா குறித்து அறிமுகம் கிடைத்தது எஸ்.ரா மற்றும் சுரேஷ் கண்ணனின் "பிச்சைபாத்திரம்" வலைத்தளங்களின் வழியே.தேசத்திற்கு தேசம் வேறுபடும் கலாசாரத்தையும்,வாழ்க்கை முறையையும் அறிந்து கொள்ள திரைப்படங்களை தவிர்த்து வேறு எளிமையான வழியிராது.அவ்வகையில் இத்தொகுப்பில் கோடிட்டு காட்டப்படும் ஆசிய/பௌத்த/வியட்நாமிய திரைப்படங்கள் எண்ணற்றவை.

ஹாலிவுட் திரைப்படங்களில் இருந்து பிற தேச திரைப்படங்கள் வேறுபடம் விதம் குறித்தும்,திரைப்பட வகைகள் குறித்தும் விரிவாய் அலசும் "ஆசிய - சினிமாவின் குவிமையம்'கட்டுரை முக்கியமான ஒன்று.மேலும் ஒரு குறிப்பிடதக்க பதிவு,அகிராவுடன் இரானிய இயக்குனர் அப்பாஸ் கிராஸ்தமியின் உரையாடல்.தொழில்முறை நடிகர்கள்,சர்வதேச விருதுகள்,மிகை நடிப்பு,தற்கால சினிமா குறித்தான அகிராவின் பார்வையை முன்வைக்கும் கட்டுரை.

இத்தொகுப்பின் கட்டுரைகள் சினிமாவை அணுகும் முறை குறித்தோ,அதன் நுணுக்கங்கள் குறித்தோ நமக்கு பாடம் சொல்லுபவை அல்ல.மாறாக அனுபவ வாயிலாக அறிமுகங்களை தந்து, நம் நினைவுகளையும் மீட்டெடுக்கும் முயற்சி.சினிமாவின் மீது தீராக்காதல் கொண்டவர்கள் தவறவிடக் கூடா வாசிப்பு!

வெளியீடு - உயிர்மை

அ.முத்துலிங்கத்தின் "வியத்தலும் இலமே"

"வியப்பு தான் மனிதனை வாழ வைக்கிறது.எப்பொழுது ஒருத்தர் வியப்பதை நிறுத்திவிடுகிறாரோ அப்பொழுதே அவர் வாழ்வதை நிறுத்தி விட்டார் என்று தான் நினைக்கின்றேன்"

- அ.முத்துலிங்கம்

இத்தொகுப்பை வாசிக்க தொடங்கிய சில நிமிடங்களில், தமிழின் அபூர்வ நூல் ஒன்றை வாசித்து கொண்டிருக்கின்றேன் என்ற எண்ணம் தோன்றியது.உலகின் தலை சிறந்த எழுத்தாளர்கள் உடனான நேர்காணல்களின் தொகுப்பிது.சமகால உலக இலக்கியத்தை அறிமுகம் செய்து கொண்டே செல்கின்றன ஒவ்வொரு கட்டுரையும்.மொழிபெயர்ப்பல்லாமல் உரையாடல்களின் நேரடி தமிழ் பதிவு. வாசகனாய் மட்டுமே தன்னை முன்னிறுத்தி எழுத்தாளர்களோடு கொண்ட உரையாடல்களை தொகுத்திருக்கும் அ.முவின் இம்முயற்சி ஆச்சர்யம் அளிப்பது.வாசிப்பின் மீதான தீராக்காதல் மட்டுமே காரணமாய் இருக்கவேண்டும்....நிச்சயமாய் அது மட்டுமே!

சிறுகதை - நாவல் வடிவம்,வாசிக்க விரும்பும் நூல்கள்,எழுதும் முறை,பதிப்பாளர்களுடனான உறவு குறித்தான கேள்விகள் பொதுவாக எல்லா நேர்காணலிலும் கேட்கபடுபவையாக இருக்கின்றன.பதில்களில் தான் நமக்கு ஆச்சர்யங்கள் காத்திருக்கின்றன.

"The Devil that danced on the water" நாவலின் அசிரியர் அமினாட்டா போர்னோ தமக்கு பிடித்த நூல் என அகராதியை கூறுகின்றார்."கொலம்பஸ் ஒரு நாட்டை கண்டுபிடித்தது போல ஒவ்வொரு புது வார்த்தையும் எனக்கு பெரிய கண்டுபிடிப்பு தான்" என்கிறார்.இத்தொகுப்பில் பல எழுத்தாளர்களால் பரிந்துரைக்கப்படும் புத்தகம் "An Obidient Father",இதன் ஆசிரியர் புலம் பெயர்ந்த இந்தியர் அகில் ஷர்மா.இந்திய அரசியல் பின்னணியில் நிகழும் இந்நாவல் கொண்டாடப்படுவதற்கு, அதிர்ச்சி மதிப்பீட்டிற்கு மீறிய காரணங்கள் உள்ளன என உணர நாவல் குறித்த சிறு அறிமுகம் உதவுகின்றது. பல்லாயிரம் டாலர் சம்பள வேலையை விடுத்து முழு நேர எழுத்தாளராய் இருப்பவர் இவர்.


இத்தொகுப்பில் எழுத்தாளர்கள் அல்லாத வேறு சில சுவாரஸ்ய மனிதர்களும் உண்டு.பறவையியல் விஞ்ஞானி கிரிஸ் பிலார்டி உடனான சந்திப்பை சொல்லலாம்,அபூர்வ பறவைகள் குறித்தும்,முற்றிலும் அழிந்து போன பறவை இனங்கள் குறித்தும் தொடரும் உரையாடல்கள் ஒரு நிமிடம் நாமும் அவர்களோடு அந்த பறவை கூடத்தில் நின்று கொண்டிருப்பதான பிரம்மிப்பை தருகின்றது.



"ஒரு விஞ்ஞானக் கதை உங்கள் அறிவை தூண்ட முடியும் அல்லது எதிர்பாராத ஒரு மூளை அதிர்ச்சியை தர முடியும்.ஆனால் இலக்கியம் என்று நீங்கள் அழைக்க வேண்டுமானால் அது உணர்வுபூர்வமாக உங்களை தொட வேண்டும்"

-- டேவிட் பெஸ்மொஸ்கிஸ்

திருக்குறளோடு ஆரம்பமாகும் அத்தியாயங்கள் கொண்ட ஆங்கில நூல் இருக்குமென நாம் நினைத்திருக்க சாத்தியங்கள் இல்லை."Cinnamon Gardens" என்னும் அந்நூலை எழுதி இருக்கும் ஷியாம் சுந்தர் சிங்கள எழுத்தாளர். தமிழ் பேசவோ, எழுதவோ தெரியாத இவர் திருக்குறளை தேர்ந்தெடுத்ததற்கு சொல்லும் காரணங்கள் சுவாரஸ்யமானவை.அனிதா தேசாயின் எழுத்தால் ஈர்க்கப்பட்டு எழுத தொடங்கியதாய் கூறுகின்றார்.அனிதா தேசாயின் "கடற்புரத்து கிராமம்"மட்டுமே வாசித்திருக்கிறேன்,வருடங்கள் பல கடந்தும் இன்னும் அந்நாவலின் மனிதர்கள் ஹரியும்,பேலாவும்,கமலாவும் மனதில் இருக்கிறார்கள்.

கடிகாரம் அமைதியாய் எண்ணி கொண்டிருக்கின்றது தொகுப்பில் படித்ததில் பிடித்தது என அ.மு பகிர்ந்திருக்கும் நூல் "Teacher Man". ஆசிரியராய் இருந்து ஓய்வு பெற்ற ப்ரான்க் மக்கொர்டின் சுயசரிதை நூல் இது.நகைச்சுவையும்,ஒளிமறைவு அற்ற இவரின் எழுத்து குறித்தும் அந்த கட்டுரையில் வாசித்திருந்தது நினைவில் இருந்தது.வாசித்தே தீரவேண்டிய பட்டியலில் "Teacher man " நூலை சேர்க்க கூடுதலான தகவல்கள் இக்கட்டுரையில் உள்ளது.எழுத்தில் இருக்கும் வசீகரமும்,நகைச்சுவையும் எழுத்தாளனிடம் எதிர்பார்ப்பது தவறு என்பதை சொல்லும் விதமாய் இக்கட்டுரை இவ்வாறாக முடிகின்றது.

"ஒரு எழுத்தை படைத்தவரை சந்திக்காமல் இருப்பதே உத்தமம் என பல சமயங்களில் தோன்றும்.இனிமேல் மக்கோர்டை எங்கு சந்தித்தாலும் அவர் இருக்கும் திசைக்கு எதிர் திசையில் செல்வேன்.அவர் புத்தகங்கள் எங்கு கண்டாலும் வாங்குவேன்"

காம இலக்கியம் படைக்கும் மேரி ஆன் ஜான் புலம் பெயர்ந்த சிங்களத்தவர்.தனது டைரி குறிப்புகளை இணையத்தில் தொடர்ந்து பகிர்ந்து வரும் இவரின் நாவல் "Bodies in Motion ", மிக நுணுக்கமான விஷயங்களை தயக்கமின்றி பகிர்ந்து கொள்கின்றார். குழந்தையின் உற்சாகத்தோடு இவர் பேசி இருப்பதாய் தோன்றியது.யாழ்ப்பான அப்பம் குறித்து இருவரும் பேசி கொள்ளும் இடம் அதை உறுதி செய்தது.

கிரேக்க புராணம் ஒன்றை (ஓடிசி) மீள் ஆராய்ச்சி செய்யும் மார்கரெட் அட்வூட்டின் "Penelopiad " நாவல் குறித்த விஸ்தாரமான அறிமுகம் பெனிலோப்பே என்னும் கிரேக்க இலக்கிய பாத்திரத்தின் மீதான மதிப்பை கூட்டுவது.புராணம் ஓடிசியசை பிரதானப்படுத்தி இருந்தாலும்,அவன் மனைவி பெனிலோப்பேவை முன்னிறுத்தி எழுதபட்டிருக்கும் இப்பெண்ணிய நாவலில் வருவதான இவ்வரிகள் என்னை கவர்ந்தன.


"நீ ஒரு தண்ணீர் பெண்.தண்ணீர் எதிர்ப்பதில்லை ,உன்னுடைய கைகளை அதற்குள் விட்டால் தழுவிக்கொள்ளும்.அது சுவர் அல்ல,உன்னை தடுக்காது.தடங்கல் ஏற்பட்டால் தாண்டி போகும். தண்ணீர் பொறுமையானது.ஒரு கல்லை கூட துளைத்துவிடும்"

வெகு சில எழுத்தாளர்கள் குறித்து மட்டுமே பகிர்ந்துள்ளேன்.தமிழ்ப் பேராசிரியர் ஜோர்ஜ் எல் ஹார்ட் உடனான நேர்காணல் குறித்து தனி கட்டுரையே எழுதலாம்.முதல் ஆச்சர்யம் தமிழ் மீதான இவருக்கு உண்டான ஆர்வம்..சங்க இலக்கியம் தொடங்கி சமகால தமிழ் இலக்கிய சூழல் வரை தோய்வின்றி பேசுகின்றார்.செம்மொழி மாநாட்டில் வரவேற்புரை நிகழ்த்தியது இவர் தான்.

உலக இலக்கியங்கள் குறித்த பேச்சின் ஊடே புதுமைப்பித்தனும், எஸ்.ராவும்,ஜெமோவும் அதை ஒத்த படைப்புகளுக்காய் கோடிட்டு காட்டப்படுவது நிறைவு.ஒவ்வொரு எழுத்தாளரையும் சந்திக்க எடுத்து கொண்ட முயற்சிகள்,எதிர் கொண்ட இடர்பாடுகள்,குறித்து வாசிக்க வாசிக்க வியப்பு மட்டுமே மிஞ்சுகிறது!!அவரவர் படைப்பு சார்ந்த கருத்தாளமிக்க உரையாடல்கள்,எத்தனை தீவிர வாசிப்பு தேவைப்பட்டிருக்கும் இது சாத்தியமாக. குறைந்த பட்சம் ஐந்து வருடங்கள் வாசிப்பதற்கு போதுமான நூல்கள் இத்தொகுப்பில் பரிந்துரைக்கபடுகின்றன.தமிழில் ஆக சிறந்த முயற்சி.தவிர்க்க கூடா வாசிப்பும் கூட.

வெளியீடு - காலச்சுவடு
விலை - 125 ரூபாய்

அசோகமித்திரன் பார்வையில் சென்னை நகரம்!!

எழுத்தாளர் அசோகமித்திரன் சென்னை நகரின் பல்வேறு பகுதிகள் குறித்து தமது நினைவில் இருந்து மீட்டெடுத்து தொகுத்துள்ள கட்டுரைகள் அடங்கியது இந்நூல். எந்திரத்தனம் மிகுந்து தோன்றும் இன்றைய சென்னையின் கடந்த கால குறிப்புக்கள் ஆச்சர்யம் கூட்டுவதோடு தெரியா பல பெருமைகளை கொண்டுள்ளதாய் உள்ளது.தமது 50 வருட கால சென்னை வாழ்கையில் தான் பார்த்த நகரத்தின் தோற்றம் அன்றும் இன்றும் கண்டிருக்கும் மாற்றங்களை வெகு நேர்த்தியாய் வர்ணித்துள்ளார்.இம்மாநகரம் குறித்த பலசெய்திகளை கொண்டுள்ள இந்நூல் சிறந்தோர் ஆவணமாகும்.




பரிட்சயம் உள்ள பகுதிகள் குறித்த கடந்த கால குறிப்புகளை படிப்பதற்கு ஏற்படும் ஆர்வம் எனக்குமிருந்தது.இத்தொகுதியில் முதலில் புரட்டியது திருவல்லிக்கேணி,மயிலை குறித்த கட்டுரைகளை.சென்னை வந்த புதிதில் தங்கியிருந்த ஹோட்டலில் பழங்கால சென்னை நகரின் காட்சிகள் கோட்டோவியங்களாய் வைக்கபட்டிருந்தன.ஆள் அரவம் அற்ற அண்ணாசாலை,மரங்கள் அடர்ந்த பைகராப்ட்ஸ் ரோடு,ஜட்கா வண்டிகள் செல்லும் மயிலாப்பூர் சாலை,படகு சவாரி பரபரப்பில் கூவம் நதி என்பதான அவ்வோவியங்கள் உயிர் பெற்றது போல இருந்தது அசோகமித்ரனின் வார்த்தைகளில் விரியும் சென்னையின் புராதானத்தை படித்தபொழுது.


திருவல்லிகேணியில் உள்ள அமீர்மஹால் பிரமாண்ட தோற்றம் கொண்டு இருக்கும்.அது குறித்து அறியும் ஆவலில் ஆட்டோ ஓட்டுனரிடம் கேட்ட பொழுது முஸ்லிம்களின் கல்யாண சத்திரம் என்றார்.திருப்திகரமான பதிலாய் இல்லை அது.இந்த நூலில் அதற்கு தெளிவான பதில் உள்ளது.ஆற்காட்டு நவாப் மாளிகையாம் அது!!அந்தந்த பகுதிகளில் வசித்த பிரபலங்கள் குறித்த குறிப்புகளும் உள்ளது.திநகர் மற்றும் திருவான்மியூர் குறித்த குறிப்புக்கள் அப்பகுதிகளின் தற்பொழுதைய பிரமாண்டத்தை எண்ணி மலைக்க வைக்கின்றன.இடுகாடும்,குட்டைகளும் சூழ்ந்த தியாகராய நகர்,வயல் வரப்பிற்கூடான திருவான்மீயூரும் இன்று கண்டுள்ள மாற்றங்கள் எல்லா பெருநகரங்களுக்கும் பொருந்தும்..


வேளச்சேரி,மந்தவெளி,சைதாபேட்டை,சென்ட்ரல் ரயில் நிலையம் என சென்னையின் எல்லா முக்கிய பகுதிகள் குறித்தும் தனது அனுபவங்களை நகைச்சுவை கலந்து பகிர்ந்துள்ளார்.ஆங்கிலேயர் காலத்து தேவாலயங்களும்,பழமையான கோவில்களும்,தர்காக்கள் குறித்த செய்திகள் புதியவை.சென்னையில் உள்ள ஆர்மேனிய தேவாலயம் குறித்த தகவல்கள் இல்லாது போனது சிறிது ஏமாற்றம்.சென்னை நகரின் பாலங்கள்,அருங்காட்சியகங்கள்,மின்சார ரயில் போக்குவரத்து,கல்வி நிறுவனங்கள்,திரையரங்குகள்,மருத்துவமனைகள் ஆகியவை கடந்த 50 வருடங்களில் கண்டுள்ள மாற்றங்கள் எளிமையாய் சொல்லப்பட்டுள்ளது.சென்னை நகரின் கடந்த கால வரலாற்றினை அறிந்து கொள்ள இந்நூல் சிறப்பாக வழிகாட்டுகின்றது.நிலவொளியில் வாணிபம் நடந்த பக்கின்ஹாம் கால்வாயும்,ட்ராம் வண்டிகள் ஓடிய சென்னை நகர சாலைகளும் இனி எப்போதும் காண கிடைக்காத காட்சிகள்...............நினைவில் இருந்து இவற்றை மீட்டெடுத்து பகிர்ந்துள்ள அசோகமித்ரனுக்கு நன்றிகள்.ஒரு பெருநகரத்தின் கடந்த கால நினைவுகளில் பயணித்து வந்த திருப்தி.


வெளியீடு - கவிதா பப்ளிகேஷன்
விலை - 60 ரூபாய்

எஸ்.ராவின் "கால் முளைத்த கதைகள்" - கட்டுரை தொகுப்பு

சில காரியங்கள்,சில நம்பிக்கைகள் காரணம் ஏதும் இன்றி நாம் தொடர்ந்து பின்பற்றி வருகின்றோம்.இயற்கையின் ரகசியங்களை கேள்விகள் ஏதும் இன்றி அப்படியே ஏற்று கொண்டிருக்கின்றோம்.எஸ்.ராவின் இந்த தொகுப்பு சிறுவர்களுக்கானது என எளிதாய் ஒதுக்கி தள்ள முடியாது.சூரியன் சந்திரன் தோன்றிய கதை, பறவைகள் நிறம் பெற்ற கதை,தென்னையும்,பனையும் தோன்றிய வரலாறு என பரவலாய் உலகின் பல பகுதிகளில் இருக்கும் நம்பிக்கைகளை பலவற்றை தொகுத்துள்ளார்.இந்திய உட்பட பிலிபைன்ஸ், பர்மா,தாய்லாந்து,இந்தோனேசியா,எகிப்து,மெக்சிகோ,கென்யா,அரேபியா என பல்வேறு நாடுகளில் உலவி வரும் நாடோடி கதைகள் படிக்க படிக்க சுவாரஸ்யம் கூட்டுபவை.



கதைகள் கற்பனா திறனை கூட்டுபவை.இரவு பொழுதுகளில் என் கழுத்தை கட்டி கொண்டு கதை கேட்கும் குட்டி தங்கைக்கென கதைகளை சேகரித்து கொண்டிருப்பேன்.கதைகளின் தோழி என்ற வார்த்தை அவளை ஞாபகபடுத்தியது.சூரியனும்,சந்திரனும்,நட்சத்திரங்களும் தோன்றிய கதை இரவும் பகலும்,கடலும் நிலமும் பிரிந்த கதைகள் தேசத்திற்கு தேசம் வேறுபடினும் பொதுவாய் முன்னிறுத்துவது கடவுளின் படைப்பின் மகிமையை.வானவில்லின் வண்ணங்கள் கொண்டு பூக்கள் நிறம் பெற்றதும்,சாபம் பெற்ற காதலனும்,காதலியும் பூவும்,வண்டுமாய் மாறியதும்,கன்னி பெண்கள் பனைமரமாய் மாறியதும்,பாம்புகள் தென்னை மரமாய் மாறியதுமாகிய நாடோடி கதைகள் அவற்றின் மீதான பார்வையை மாற்றி அமைப்பவை.

50 திற்கும் மேற்பட்ட நாடோடி கதைகள் கொண்ட இத்தொகுப்பில் நான் ரசித்த கதைகள் உப்பு மற்றும் வெற்றிலை பாக்கு சுண்ணாம்பு உருவானத்திற்கு சொல்லப்படும் நாடோடி கதைகள்.வியாபாரி ஒருவனின் பேராசையால் உப்பு தருவிக்கும் எந்திரம் கடலில் மூழ்கி அதை நிறுத்தம் மந்திரம் தெரியாததால் இன்றும் கடல் உப்பு தன்மை கொண்டுள்ளதாய் சொல்லுகின்றது குஜராத் பழங்குடியின கதை.ஒரே பெண்ணின் மீது ஆசை கொண்ட இரட்டையர்கள் அவள் மீதுள்ள காதலின் காரணமாய் எப்பொழுதும் இணைபிரியாதிருக்க வெற்றிலை,பாக்கு,சுண்ணாம்பாக பிறவி எடுத்தாய் சொல்லுகின்றது வியட்நாம் தேசத்து கதை.நாள்முழுதும் பறவைகளுக்கும்,மிருகங்களுக்கும் வர்ணங்களை தீட்டிய கடவுள் இறுதியாய் வந்த குயிலை வர்ணம் ஏதுமின்றி அனுப்பியதால் அது சோகத்தோடு பாடி திரிவதாய் பிகார் பழங்குடியினர் நம்பிக்கை.

மேல சொன்ன கதைகள் இத்தொகுபிற்கான சிறிய அறிமுகம்.இதுபோன்ற எண்ணற்ற நாடோடி கதைகள் இதில் அடக்கம்.சர்ப்பம் நதியாகவும்,நதிகள் மரமாகவும்,மரங்கள் கடவுளாகவும் மாறியதாய் இருக்கும் நம்பிக்கைகள் ஆச்சர்யமூட்டுபவை.கதைகளை தருவிக்கும் ரகசிய குகையின் வாயில் எப்பொழுதும் திறந்தே இருக்கின்றது.அதை தேடி செல்வதும்,தேடாதிருப்பதும் அவரவர் விருப்பம்.எது எப்படியாயினும் கதைகளின் தோழியாய் இருப்பதே எனக்கு பெரும் மகிழ்ச்சி!!

வெளியீடு - உயிர்மெய்
விலை - 100 ரூபாய்

அ.முத்துலிங்கத்தின் "கடிகாரம் அமைதியாய் எண்ணி கொண்டிருக்கின்றது"

தேர்ந்த தமிழ் எழுத்தாளர்கள் பலர் தங்களுக்கு மிக பிடித்த நூல் ஒன்றினை குறித்து விவரித்துள்ள கட்டுரைகளின் தொகுப்பு.இத்தொகுப்பினை சாத்தியமாக்கிய முத்துலிங்கத்தின் முயற்சி பாராட்டப்பட வேண்டியது. எஸ்.ராமகிருஷ்ணன்,ஜெயமோகன்,சாரு நிவேதிதா, நாஞ்சில் நாடன்,அசோகமித்திரன், சுஜாதா,அம்பை,மனுஷ்யபுத்திரன்,பாவண்ணன் உட்பட 20 எழுத்தாளர்களின் விருப்ப நூல் குறித்த கட்டுரைகள் இதில் அடக்கம்.



ஜோ.டி.குரோஸ் இன் "ஆழி சூழ் உலகு" குறித்த நாஞ்சில் நாடனின் கட்டுரை கடல்-கடலோடி- கடலோடியின் வாழ்வு குறித்து தமிழில் வெளிவந்த முதல் சிறந்த நாவல் என்பதாய் உள்ளது.இவ்வாண்டு புத்தக சந்தையில் வாங்கிய இந்த புத்தகத்தை விரைவில் தொடங்கும் ஆர்வம் மேலிட்டது.மனுஷ்யபுத்திரன் தமக்கு பிடித்த நூல் என ஜெயமோகனின் "ஏழாம் உலகம்" நாவலை குறிபிட்டுள்ளார்.முழுக்க முழுக்க பிச்சைகாரர்களின் வாழ்வை குறித்த இந்நாவலை தமிழின் மற்றுமொரு சிறந்த விளிம்புநிலை இலக்கியம் என கூறுகிறார்.

இதற்கு முன் நான் கேட்டிராத பெயர் கால பைரவன்,இவரின் "புலிப்பாணி ஜோதிடம்" சிறுகதை தொகுப்பை குறித்தது பாவண்ணனின் கட்டுரை.மதுரை நகரம் குறித்த முழு ஆராய்ச்சி நூலை படிக்க வேண்டும் என்பது எனது நீண்ட நாள் ஆசை.எஸ்.ரா பரிந்துரைத்துள்ள "எண்படுங்குன்றம்" தொகுதி மதுரையை சுற்றி உள்ள சமண குகைகள் குறித்த முனைவர் வேதாச்சலத்தின் ஆராய்ச்சி கட்டுரைகள் கொண்ட தொகுப்பு.நிச்சயம் தேடி வாசிக்க வேண்டிய நூல்.

குறிப்பிட்டு எந்த நூலை குறித்தும் சொல்லாது பொதுவாய் தமது வாசிப்பு அனுபவம் குறித்து சுஜாதா எழுதியுள்ள "படிப்பின் பயணம்" கட்டுரை அதிகமாய் புதுமைப்பித்தனின் முதல் தற்பொழுதைய ஆங்கில இலக்கியம் வரை அலசுகிறது.சா.கந்தசாமியின் "மாயவலி" நாவல் மற்றும் அம்ஷன்குமாரின் "ஒருத்தி"(திரைப்படமாய் வந்தது) திரைக்கதை நூலும் அசோகமித்ரனின் விருப்ப பட்டியலில் உள்ளவை.

பள்ளி ஆசிரியராய் வாழ்வை தொடங்கி எழுத்தாளராய் ஆனா Mc.Court இன் சுயசரிதை நூலான "Teacher Man" பற்றிய முத்துலிங்கத்தின் விரிவான கட்டுரை Mc.Court இன் பேட்டியின் சிறு பகுதியோடு சுவாரஸ்யம் கூட்டுகின்றது.சாருவின் கலகம்,இசை,காதல் மற்றும் வரம்பு மீறிய பிரதிகள் இரண்டு நூல்களில் இருந்த அயல் இசை மற்றும் இலக்கிய கட்டுரைகள் பரிந்துரைத்த எழுத்தாளர்கள் பட்டியல் மிக நீளம்.படித்து வியந்த தொகுப்புகள் அவை.அதில் ஒரு சிறு பகுதி என "சம கால அரபு இலக்கியம்" கட்டுரை அமைந்துள்ளது.

வெளியீடு - உயிர்மெய்
விலை - 85 ரூபாய்

"வேட்டி" - கி.ராவின் சிறுகதை மற்றும் கட்டுரை தொகுப்பு

கி.ரா வின் கதைகள் யாவும் கரிசல் மண்ணின் அனுபவ பகிர்தல்கள்.சற்றே கற்பனை கலந்து கேட்பவனை தன்வச படுத்த கதை சொல்லும் யுக்தி கதை சொல்லிகளுக்கே உண்டானது.அவ்வகையில் கி.ரா வின் கதைகளில் வரும் கற்பனை காட்சிகள் சுவாரசியமானவை.சில எழுத்துக்கள் எத்தனை முறை படித்தாலும் சலிக்காத வசீகரத்தை கொண்டிருப்பவை,கி.ரா வின் எழுத்துக்களை போல.நீண்ட நாட்களுக்கு பிறகு மீண்டும் படித்த பொழுது இத்தொகுப்பு தந்த நிறைவு அலாதியானது.

கரிசல் பக்கத்து சம்சாரிகளின் நித்ய ஆடை வேட்டி.துங்கா நாயக்கரின் ஒரே ஒரு வேட்டி கிழிந்து விட கவலையில் அமர்ந்து அவர் வேட்டி குறித்து தம் சிந்தனையை ஓட விடுகிறார்.ஊரில் உள்ள ஒவ்வொரு மனிதனும் எவ்வாறு தன் வேட்டியை பராமரிகின்றான் என நகைச்சுவை கலந்து சொல்லுகின்றது "வேட்டி" சிறுகதை. சீவி,சிங்காரித்து,மை பூசி அழகு பார்க்க கரிசல் பெண்களுக்கு நேரமும் இல்லை விருப்பமும் இருக்காது.பிறந்தது முதல் வீட்டு வேளையிலும்,காட்டு வேளையிலும் நாட்களை கழித்த பெண்ணொருத்தி திருமணம் அன்று தலையில் வைத்த பூவின் வாடை தாளாது மயங்கி விழுந்த கதை "பூவை".

இத்தொகுதியில் பெரும்பாலான கதைகள் கரிசல் பக்கத்து பெண்களை மையமாய் கொண்டவை.வேலை..வாழ்கையே வேலை சிறுகதை சம்சாரி வீட்டு பெண்ணொருத்தியின் காட்டிலும்,வீட்டிலும் கழியும் ஒரு நாள் பொழுதினை விவரிப்பது.கால சுழற்சியில் விவசாய வியாபாரத்தில் ஏற்படும் மாற்றங்களை வயதான சம்சாரியின் பார்வையில் சொல்லும் கதை "எங்கும் ஒரே நிறை".மற்றும் புதிதாய் திருமணமான தம்பதியருகுள்ளான பிரியத்தை சொல்லும் கி.ரா வின் பிரபலமான சிறுகதை "கனிவு"ம் இதில் அடக்கம்.




இத்தொகுதியில் அமைந்த சற்றே நீண்ட சிறுகதை,"கரிசல் காட்டில் ஒரு சம்சாரி".எனக்கு பிடித்த சிறுகதையும் கூட.துரைச்சாமி நாயக்கர் - உழைப்பை மட்டுமே மூலதனமாக கொண்டு,விவசாயத்தில் புதிய தந்திரங்களை கையாண்டு,பண விஷயத்தில் கருமி தனம் செய்து காண்பவர் ஆச்சர்யப்படும் வண்ணம் வாழ்ந்த சம்சாரி.உளவுக்கு மாடு பிடிப்பது,பஞ்ச காலத்திற்கு முன்பே தானியங்கள் சேமிப்பது,உறவுகளை விட்டு விலகியே இருந்து பணத்தையும்,சச்சரவுகளையும் குறைப்பது,பெரு மழைகால இரவில் வயலில் சென்று நீரின் தடம் மாற்றுவது,அதிக விலை பெறுமானமுள்ள தோட்டத்தை பேச்சு சாதுர்யத்தால் குறைவாய் பேசி முடிப்பது என செய்யும் ஒவ்வொரு காரியத்திலும் திட்டமிடுதலை கையாண்ட துரைசாமி நாயக்கரின் கதையை கதை சொல்லி தம் நண்பருக்கு சொல்வதை அமைந்துள்ள இக்கதை சில இடங்களில் எனக்கு என் தாத்தாவை நினைவூட்டியது.

சிறுகதைகள் தவிர்த்து கி.ராவின் சில கட்டுரைகளும் இதில் உண்டு.தமது கிராமமான இடைசெவல் குறித்த கி.ராவின் "எங்கள் கிராமம்".தாம் முதலில் எழுதிய கடிதம் குறித்தும் நினைவுகளை,கதைக்கு கரு உருவாக காரணமாய் அமைந்த சில நிகழ்ச்சிகளையும் குறித்து விரிவாய் பதிவு செய்துள்ளார்.இதில் புதுமைபித்தனின் "துன்பக்கேணி" மற்றும் சு.ரா வின் "அக்கரை சீமையிலே" ஆகிய கதைகள் சிறப்பானவை என குறிப்பிட்டு சொல்லி உள்ளார்.சிறுகதைகள்,கட்டுரைகள் தவிர்த்து கி.ரா வின் பல கடிதங்களும் இதில் உண்டு.மொத்தத்தில் கி.ராவின் கதைகள்,கட்டுரைகள்,கடிதங்கள் என யாவும் சேர்ந்த அறிய தொகுதி இது.

வெளியீடு - அன்னம் பதிப்பகம்

பாவண்ணனின் "எனக்கு பிடித்த சிறுகதைகள்" மற்றும் "கடலோர வீடு"

நாவலோ சிறுகதையோ படிக்கும் பொழுது அதன் மனிதர்களும்,நிகழ்வுகளும் ஏதோ ஒரு இடத்தில் நமக்கு மிக நெருக்கமாய் தோன்றலாம்.அவ்வாறு தான் மிகவும் நெருக்கமாய் உணர்ந்த சிறுகதைகளை தனக்கு நேர்ந்த நிகழ்ச்சிகளின் பின்னணி கொண்டு தொகுத்துள்ளார் பாவண்ணன்.தமிழின் தலை சிறந்த எழுத்தாளர்கள் அனைவரின் சிறுகதைகளும் இதில் அடக்கம்.நாம் படித்த மற்றும் படிக்காத சிறுகதைகளை குறித்து முற்றிலும் ஒரு புதிய கண்ணோட்டத்தில் மிக எளிமையாய் சொல்லியுள்ளார் பாவண்ணன்.


எனக்கு பிடித்த வண்ணதாசனின் "தனுமை" சிறுகதை மிக பிடித்தமானதாய் மாறிபோனது பாவண்ணனின் விமர்சனம் படித்த பின்னரே.சிறிதும் ஒத்து போகாத மனநிலை கொண்ட இருவர் ஒரே அறையில் தங்க நேரும் சங்கடத்தை சொல்லும் ஆதவனின் "ஒரு அறையில் இரு நாற்காலிகள்',விளிம்பு நிலை மக்களின் வாழ்கையை மிகையின்றி சொல்லும் ஜி.நாகராஜனின் "ஓடிய கால்கள்", விதவை தாயின் மனநிலையை சொல்லும் அசோகமித்ரனின் "அம்மாவுக்காக ஒரு நாள்", புதுமைபித்தனின் "மனித எந்திரம்" , சு.ரா வின் "பள்ளம்" என ஒவ்வொரு சிறுகதையையும் ரசித்து தம் அனுபவ நிகழ்ச்சிகளோடுகூறியுள்ளார் ஆசிரியர்.



பாவண்ணனின் சிறுகதை தொகுப்பு "கடலோர வீடு" .பெரும்பாலான கதைகள் மனிதனின் தனிப்பட்ட மனநிலையை,விருப்பங்களை முன்னிறுத்தி சொல்லப்பட்டவை.பெரியதொரு பறவைகள் சரணாலயத்தை விருப்பத்தோடு பராமரிக்கும் ஒரு முதியவரின் மனபோராட்டங்களை சொல்லும் கதை "பறவைகள்".
புராண நிகழ்வின் புனைவாக கிருஷ்னையை மணக்க வைக்கப்படும் சுயம்வரத்தில் வென்றிட துடிக்கும் துரியோதனனின் ஒவ்வொரு நொடி மனவோட்டத்தையும் விவரிக்கும் கதை "இன்னும் ஒரு கணம்".

முதியோர் இல்லத்தில் தங்க வைக்கபட்டிருக்கும் நண்பனின் உறவினரை காண செல்லும் நாயகனின் ஒரு நாள் பொழுதினை,தாள முடியாத சோகத்தில் தள்ளும் அப்பெண்மணியின் நிலையை வெகு நேர்த்தியாய் சொல்லும் கதை "விளிம்பின் காலம்" .பெருகி வரும் முதியோர் இல்லங்கள் மலிந்து வரும் பந்த பாசத்தை மறைமுகமாய் உணர்துபவையே!!நவீன உலகில் பிராணிகளுக்கு அளிக்கப்படும் மதிப்பும்,பிரியையும் சக மனிதர்களுக்கு தரப்டுவதில்லை என்பதை சற்றே நகைச்சுவை கலந்து சொல்லும் சிறுகதை "பாதுகாப்பு".


பாவண்ணனின் எழுத்துலகம் சராசரி மனித வாழ்வின் அவலங்களை வெகு நுட்பமாய் எடுத்தாளுகின்றது.மிக கடினமான கருத்துக்களை கதை போக்கில் இயல்பாக உணர்த்தி, மிக அழுத்தமாக பதிவு செய்கின்றார்.

"எனக்கு பிடித்த சிறுகதைகள்" - காலச்சுவடு வெளியீடு
"கடலோர வீடு" - காவ்யா வெளியீடு

பாரதியார் கட்டுரைகள்

1970 களில் பூம்புகார் பதிபகத்தால் வெளியிடப்பட்ட பாரதியாரின் கட்டுரைகள் தொகுப்பு படிக்க கிடைத்தது.கவிதைகள் மூலமாகவே பாரதியை உணர்திருந்த எனக்கு அவரின் கருத்து தெளிவும்,சிந்தனை தெளிவும் கொண்ட கட்டுரைகள் வாசிக்க வாசிக்க சிறப்பாய் தோன்றியது.தாம் வாழ்காலத்தின் சூழ்நிலைகளையொட்டிசமயம்,சமூகம்,அரசியல்,கலைகள் குறித்து பாரதி எழுதிய கட்டுரைகளின் தொகுப்பாய் வெளிவந்துள்ளது இந்நூல்.

தத்துவம்,உண்மை,மாதர்,கலைகள்,சமூகம் என பல்வேறு தலைப்புகளில் கீழ் தொகுக்கபட்டுள்ள கட்டுரைகளுள் மாதர் என்னும் தலைப்பின் கீழ் உள்ள பெண் விடுதலை குறித்த விழிப்புணர்வு கட்டுரைகள் இப்பதிவு எழுத காரணமாய் அமைந்தது.அதிலும் சீனத்து புரட்சி பெண்மணி "சியூ சீன்" குறித்து தன் மகளுக்கு பாரதியின் கடிதம் குறிப்பிட்டு சொல்ல வேண்டிய ஒன்று.



900களில் வாழ்ந்த சியூ சீன் திருமணம் ஆகி வீட்டில் பொழுதை கழித்த காலங்களில் அந்நிய படையெடுப்புகளில் பங்கு கொள்ள பெண்களுக்கு வழி இல்லாதது குறித்து " மனிதர்களாய் பிறந்து,தமது மனித சக்தியை காண்பிக்கும் பொருட்டாக கஷ்டங்களையும்,விபத்துக்களையும் எதிர்த்து உடைக்கும் பாக்கியம் இல்லாமல் போய்விட்டதே!வீட்டு காரியங்களின் அற்ப கவலைகளுக்கு இரையாகி மடியவா நாம் பூமியில் பிறந்தோம்??" என வருத்தம் கொண்டு குடும்பம் விட்டு பிரிந்து போர் கலைகளில் தேர்ந்து,நாடு தாண்டி இளைஞர்களை பயிற்றுவிக்கும் போர் பாசறை ஒன்றினை தொடங்கி வீர பெண்மணியாய் திகழ்ந்துள்ளார்.."ஏஷியாடிக் ரிவியூ" என்னும் இதழில் வெளிவந்த சியூ சீன் குறித்த கட்டுரையின் சாராம்சத்தை தன் மகள் தங்கம்மாவிற்கு கடிதமாய் எழுதியுள்ளார் பாரதி.

பாரதி என்றதும் என் நினைவிற்கு வருவது அவர் கவிதைகளோடு, தன் மனைவியோடு கம்பீரமாய் நிற்கும் எங்கள் வீட்டு பட்டகசாலையில்யுள்ள உள்ள புகைப்படம்.இனி சியூசீன் யின் வீர வரலாறும் சட்டென நினைவிற்கு வரும் என்பதில் சந்தேகம் இல்லை.

நூல் வெளியீடு : பூம்புகார் பதிபகத்தார்
விலை : 10 ரூபாய்

கணையாழியின் கடைசிப்பக்கங்கள்(1968-1998) - சுஜாதா

கணையாழி இலக்கிய இதழில் சுஜாதா ஸ்ரீரங்கம் எஸ்.ஆர் என்கிற புனைப்பெயரில் 1968 முதல் 1998 வரை எழுதிய பகுதி மற்றும் பெட்டி என்கிற தலைப்பின் கீழ் எழுதியவை யாவும் தொகுக்கப்பட்டு உயிர்மெய் பதிபகத்தால் வெளிவந்துள்ளது.தொகுத்தவர் தேசிகன்...ஒரு கமர்ஷியல் எழுத்தாளராக/விஞ்ஞானியாக/வசனகர்த்தாவாக மட்டுமே அறிய பட்ட சுஜாதா இந்நூலின் மூலமாக சிறந்த விமர்சகராக நமக்கு வெளிபடுகிறார்.A pefect critic.இந்நூலின் தொகுப்புக்களை சினிமா,தமிழ் இலக்கியம்-கவிதை,அறிவியல் என மூன்று வகையாய் சுலபமாய் பிரிக்கலாம்..

சினிமா:

சுஜாதா 1960களில் வெளிவந்த தமிழ் திரைப்படங்களை அவருக்கே உரிய பாணியில் பகடி செய்திருப்பது அருமை...சிவாஜி,எம்.ஜி.ஆர் படங்களையும்,பீம்சிங்க்தின் பா வரிசை படங்களையும்,எம்.எஸ்.விஸ்வநாதனின் இசையையும் சமகாலத்தில் விமர்சித்து இருப்பது தற்போது சாத்தியமா என்றால் நிச்சியமாய் இல்லை.சிறந்த திரைப்படங்களை அழகாய் பதம் பிரித்து சுஜாதா செய்துள்ள விமர்சனங்கள் காலத்தை கடந்து நிற்கும் அத்த்திரைப்படன்களே அத்தாட்சி..குறிப்பிட்டு சொல்லவேண்டியவை -ரேயின் பதேர் பாஞ்சாலி,மீரா நாயரின் சலாம் பாம்பே ,கிரீஸ் காசர்கோட்டின் கடஸ்ரேதா,ஷ்யாம் பெனகலின் திரைப்படங்கள்..


கமலஹாசனுடன் தாம் கொண்டிருந்த நட்பினை மெய்பிக்கும் வண்ணம் தொடர்ந்து கமலோடு தான் செலவழித்த கனங்களை நினைவு கூறுகிறார்.. 1980 களில் வெளிவந்த திரை இசைப்பாடல்கள் பெரும்பாலும் கொண்டிருக்கும் பாடல் வரிகளின் ஒத்த வார்த்தைகள் என சுஜாதா கூறும் பட்டியல் சிரிக்க வைக்கும் உண்மை .. அன்றைய காலகட்ட இளைஞர்களை அக்னிநட்சத்திர வாலிபர்கள் என கோடிட்டு காட்டி இருப்பது சினிமா மோகம் கொண்டும் திரியும் இளைஞர்களுக்கு என்றும் பொருந்தும்..1990 இல் வெளிவந்து பெரும் வெற்றி பெற்ற அஞ்சலி திரைப்படத்தின் ஒளிப்பதிவு மிக்க இருள் சார்ந்து எடுக்க பட்டதை கண்டித்து இருக்கும் சுஜாதா அரண்மனை கிளி திரைபடத்தை அறை பக்கத்திற்கு விமர்சனம் செய்திருப்பது வேதனை.

இலக்கியம் - தமிழ் - கவிதை :

சங்க இலக்கியம் மீது சுஜாதா கொண்டிருந்த ஆர்வம்,தேடல்,ஆராய்ச்சி நான் சற்றும் எதிர்பாராதது.சமீபத்திய சுஜாதா இரங்கல் கட்டுரை ஒன்றில் குறிப்பிட்டு இருந்தது "அவர் கொண்டிருந்த தீவிரம் அவர் எழுத்தில் இல்லை " நினைவில் வந்தது..குறுந்தொகை,சிலப்பதிகாரம்,ஆழ்வார் பாடல்கள்,கம்பராமாயணம்,ஆண்டாள் பாசுரம் என சங்க இலக்கியத்தோடு அழகிய தேடலில் ஈடுபட்டதோடு சிறந்த சங்க இலக்கிய விளக்க உரை நூல்களை பகிர்ந்துள்ளார்..சங்க இலக்கியத்தை அடுத்து கவிதை மீது அவர் கொண்டிருந்த காதல் அலாதி..அதிலும் முக்கியமாய் ஹைக்கூ கவிதைகளை அறிமுகம் செய்து அதை எழுதுவதற்கான விதிகளை விளக்கி தான் ரசித்த,படித்த சிறந்த கவிதைகளை கூறி இருப்பது கவிதையில் ஆர்வம் இல்லாதவர்களையும் ஈர்க்கும் சுஜாதாவின் வார்த்தை வசியம்.

தமிழ் எழுத்தாளர்களில் சுஜாதாவிற்கு மிக விருப்பமாய் இருந்தவர்கள் வண்ணதாசன்,சுந்தர ராமசாமி,அசோகமித்திரன்,ஜானகிராமன்,கி.ராஜநாராயணன் என பட்டியல் நீக்கிறது..சுந்தர ராமசாமியின் "ஒரு புளியமரத்தின் கதை" யையும்,கி.ரா வின் "கோபல்ல கிராமத்தையும்" விரிவாய் விமர்சித்துள்ளார்..தனது நாவல்கள்,கதைகள் குறித்த வாசகர்களின் எதிர்வினைகளை எந்த ஒரு ஒளிவு மறைவும் இன்றி குறிப்பிட்டுள்ளார்.இலக்கிய கூட்டம் ஒன்றில் "நீ என்ன எழுதி சாதிச்சனு இங்க வந்து இருக்க" என ஒருவர் கேட்டதை எழுதி தனக்கே உரிய பகடி யோடு பதில் அளித்ததை கூறிஉள்ளார்.உலக தமிழ் மாநாட்டில் சுஜாதாவின் உரை நிறைவேற்றப்படவேண்டிய அறிய பல நிதர்சன கருத்துக்கள் கொண்டது..தமிழை ஆக்சிஜென் குடுத்து காப்பற்றும் நிலை வராது இருக்க அவர் கூறும் வழிமுறைகள் பரிசீலிக்கபடவேண்டியவை.

அறிவியல்:

இந்நூலை படிக்க தொடங்கும் முன் எனக்கு தோன்றியது சுஜாதாவின் அறிய பல அறிவியல் கருத்துக்கள் நிறைந்து இருக்கும் என்பதே..சற்றும் எதிர்பாராமல் சங்க இலக்கியம் குறித்தும்,கவிதை எழுதும் விதிகளை விளக்கியும் தனது மற்றுமொரு முகத்தை வெளிகாட்டி அதிர்ச்சிக்கு ஆளாகிவிட்டார்.மிக சிறிய அளவிலான அறிவியல் கட்டுரைகளே இதில் உள்ளது.மின் ஒட்டு பதிவு இயந்திரம் கொண்டுவந்ததில் தனக்குள்ள பங்கினை எளிமையாய் விளக்கி உள்ளார்.ஓசோன் மண்டலம் சிதைந்து வருவதை தடுக்க "Green House effect" - குறித்த எளிய விளக்கம் ஒன்றினை பாமரனும் புரிந்து கொள்ளும் வண்ணம் அளித்து இருப்பது நன்று.தமிழில் கணினியில் தட்டச்சு செய்யும் முறை குறித்தும்,அது நடைமுறை படுத்த அணுகவேண்டிய சாப்ட்வேர் நிறுவனகள் குறித்த கட்டுரை பயன்தரக்கூடியது.மாணவர்களோடு நடந்த நேரடி உரையாடல் ஒன்றில் 2000 தில் நடக்க சாத்தியமானவை என சுஜாதா பட்டியலிட்டுள்ளது யாவும் தற்போது நடைமுறையில் உள்ளது..

இப்புத்தகத்தை முழுதும் படித்து முடித்ததும் நிறைந்த திருப்திக்கு மாறாக விடை தெரியா கேள்விகள் சில மனதில் வந்து மறைந்தது,அவை...


- சங்க இலக்கியம் முதல் தற்கால ஹைக்கூ முதல் வியந்து விவரித்து எழுதி உள்ள சுஜாதா சிறந்த கவிதைகளை தராது ஏனோ??தி.ஜா,சு.ரா,கி.ரா என தமிழ் இலக்கிய வாசிப்பை விஸ்தாரமாய் அலசி விமர்சித்தவர் அவர்கள் போல இன்றும் பேச கூடிய ஒரு நல்ல நாவலை தராதது வருத்தமே..

- ரே,மீரா நாயர்,ஷ்யம்பெனகள் என சிறந்த இயக்குனர்களின் திரைப்படங்களை சிறப்பாய் மதிப்பிட்டு விமர்சனம் செய்து அன்றைய கால தமிழ் திரை உலகம் உருபடாது என கடுமையாய் சாடி எழுதி விட்டு..பின்னாளில் தானும் அந்நியன்,சிவாஜி என கமர்ஷியல் குப்பையில் விழுந்தது unacceptable compromise!!

- அனேகமாக உலகின் சிறந்த புத்தகங்கள் யாவும் சுஜாதா படித்து இருப்பார்..அறிவியலில் சிறந்தவர்..இருந்தும் தன் ஜாதியின் மீது கொண்ட ஒரு வித பெருமை அவர் எழுத்துக்களில் ஆங்காங்கே தெரிவதை மறுப்பதற்கில்லை..

எது எப்படியோ..மறுக்க முடியாத உண்மை..He is an inborn Genius!!